A Lettera | ASSEMBLEA GENERALE : «Risturà un dialogu seriu »

A Lettera | ASSEMBLEA GENERALE : «Risturà un dialogu seriu »

Hè u messaghju ch’ellu hà fattu passà Jean Dominici davant’à l’eletti cunsularii, l’auturità di u Statu è a Cullettività di Corsica. In sti tempi difficiuli, hè d’obligu ch’ellu sia rimessu in ballu u prucessu.

Avia l’assemblea generale, adunita à u palazzu cunsulariu di Bastia marti u 29 di nuvembre, a tunalità grave è sulenne di un avvene incertu. Hà culuritu u discorsu cuncisu ma densu di u presidente. Incù l’appiombu è senza circunvuluzione inde u so discorsu, hà avvintu Jean Dominici l’imbusche è i mezi di pudè le afferà. Sò state appuculite e risorze fiscale di l’istituzione ch’ellu capitaneghja per via di decisione naziunale à u mumentu ch’ella campa l’ecunumia di l’isula ‘ssa ripresa fulgurante di l’attività più cum’è qualchì rifiatu chè cum’è un abbriu, postu chì passanu l’intraprese è i cummerci d’una crisa à l’altra, da u siscu stampitivu à a guerra inflaziunista. Inde ‘ssu cuntestu, ùn servanu micca a causa di l’ecunumia i trataloni di u prucessu ingagiatu trà a Corsica è u Statu. Eccu perchè ch’ellu hè statu u messaghju forte mandatu da u presidente una chjama à a ripresa di a cuncertazione. Ùn si trattava mancu appena per Jean Dominici di impachjà si à mezu à i cuntrasti chì anu fattu attempà u prucessu, ma di mette in risaltu u bisognu imperiosu di rimette in ballu u dialogu. « Simu cunvinti chì l’evuluzione è e riforme ch’ellu hà lasciatu intravede u prucessu Darmanin ùn puderanu passà chè per via di u ristoru rapidu di un dialogu seriu è fidanciu, senza cuncessione ma apertu, trà l’eletti di a Corsica è u guvernu. » À sente u presidente, a facenu propiu vede i dibattiti parlamentarii recenti rilativi à u prugettu di Lege di finanze : malgradu u ricorsu sistematicu à u 49.3, hà validatu u guvernu parechji amendamenti di i parlamentarii di a Corsica è in particulare a prurugazione, per dui anni, di u Creditu d’impositu Investimentu cù, in prima, a prumessa ch’ellu serebbe rivalutatu per stu 2023.

U MINISTRU DI RITORNU… L’ANNU CHÌ VENE

Hè statu mandatatu cum’ellu si deve Gérald Darmanin da u Presidente di a Republica per discutà, cù l’eletti è e forze vive di a Corsica, di a pussibilità di incaminà si ver’di un statutu d’autunumia. Eppuru, hè u ministru di l’Internu u più (pre)occupatu di tutti i ministri. Li tocca à risponde guasi tutti i ghjorni à l’inghjunzione di una securità pruteiforma è à primurà si di i territorii alluntanati, cum’ellu l’hà fattu pocu fà in Nova Caledunia. Qualchì ghjornu fà, hà tramandatu torna una volta u so ritornu in Corsica à u principiu di l’annu chì vene ma hà digià fattu sapè ch’ellu a ferebbe inde un quadru più largu chè quellu di a missione presidenziale chì li hè stata cunfidata. Ci vole vede Jean Dominici un « segnu forte » è, forse, l’epilogu di sta fasa di attempamentu di u prucessu. « Di pettu à una ecunumia fragile è sposta à tutte e sfide, di pettu à tutte e transizione chì si prisentanu, a ci dicenu, tanti afflitti, i nostri sudditi : u solu esitu pusitivu à ‘sse difficultà passa per l’appaciamentu, a ragiò è i scambii. Quì quant’è in Parigi, devenu piglià a suprana e bone vuluntà da ch’ellu sia rimessu in ballu u prucessu. Ch’ella sia capita bè chì ci vulemu participà propiu à a piazza chì serà a nostra, per u rispettu di a nostra ecunumia è per l’equilibrii duraticci di a nostra sucetà. » Nant’à stu puntu, ci hà vulsutu rassicurà propiu u prefettu di u Cismonte. A cunferma di modu chjaru Michel Prosic : « Hà tutta a so piazza l’ecunumia inde e discussione cù u Statu. Una regione chì campa bè, hè una regione induv’elle investiscenu l’intraprese, è arreca st’investimentu per a pupulazione impeghi è benestà. L’intrapresa, hè dinù a maghjina di un territoriu, di u so dinamisimu, di a so capacità d’innuvazione. Ci cuntribueghja a CCI di Corsica, sò ammirativu propiu di a so azzione à u serviziu di i so sudditi. » Ùn ci serà propiu nunda à aghjustà !

 

Di u riattaccamentu à a Cullettività di Corsica

Spiccia u tempu. Hè l’altru messaghju di u presidente trattendu si di u trasferimentu di tutella di e camere cunsularie à a Cullettività di Corsica. Dapoi l’aduzzione di a lege PACTE, di maghju 2019, chì apre a via à stu riattaccamentu, ùn hè mossu nunda o guasi, fora di u raportu d’infurmazione prisentatu u 28 di ghjennaghju scorsu da Gilles Simeoni à l’Assemblea di Corsica. Eppuru, u 22 di sittembre, hà mandatu una lettera ufficiale u presidente di u Cunsigliu esecutivu à a Prima ministra è à a presidenza di u Senatu è di l’Assemblea naziunale per ammintà stu cartulare. « Ùn si pò mancu pensà, per noi, per i nostri partinarii, per i nostri cullaburatorii, di cuntinuà un’attività nurmale s’è ùn avemu micca, inde e settimane chì venenu, a lisibilità è a garantia di un prugramma di travagliu seriu nant’à ‘ssu prugettu di riforma », insiste Jean Dominici. Hà vulsutu appacià i penseri Nanette Maupertuis : « Hè u scenariu di a creazione di un stabilimentu publicu chì ghjè statu ritenutu. Ci travaglianu i nostri servizii. Simu entruti propiu inde a fasa uperaziunale di a riforma. » Basta à sperà.

Pour accéder à la version française de l’article, cliquez ici 

 

ARTICLE PARU DANS L’ÉDITION N°27  (décembre 2022) DE LA LETTRE – CCI DE CORSE

Lire La Lettre