A Lettera | L’aeroporti corsi si buscanu u so labellu

A Lettera | L’aeroporti corsi si buscanu u so labellu

 Si sò buscati Aiacciu, Bastia, Calvi è Figari a certificazione « Airport Carbon Accreditation » per a so capacità à riduce a so impronta di carboniu inde u so funziunamentu. Tamanta perfurmanza !

Serà da marcà cù una petra bianca a data di u mercuri u 21 di dicembre inde a storia di a nostra istituzione. In fatti, hè stata distinataria a CCI di Corsica, stu ghjornu custì, di una lettera ufficiale mandata da l’ACI-Europa (Airports Council International), un urganisimu stallatu in Brusselle chì face da portavoce di l’industria aeroportuaria per l’istanze europee e più alte (sò raprisentati più di 500 aeroporti di 45 paesi). Annunziava tandu issa lettera l’acquistu di a certificazione ACA (Airport Carbon Accreditation) di livellu 2 per l’inseme di e piattaforme isulane. Un labellu chì ricunnosce – ci vole à piglià lu propiu in u sensu di una ricunniscenza – l’azzione di reduzzione energetiche messe in ballu mentre l’anni scorsi è, di fatti, una diminuzione di l’emissione di gasi à effettu serra nant’à i quattru siti.

Hà da purtà l’aeroporti issu livellu 2 d’implicazione battizatu « Riduzzione » (per ghjunghje ci, devenu esse inferiore l’emissione tutale di l’annu u più recente à a media di i trè anni passati) ver’di una impronta di carboniu cù di menu in menu impattu frà un tempu abbastanza cortu. Di fatti, hè lanciata a dicarbunazione di e nostre piattaforme è hè entruta propiu a camera inde una era eculogica nova. Era indispensevule : da a banda di l’uperatori aerei, hè diventatu una ossessione l’impattu nant’à l’ambiente è, da a banda di i passageri, hè di più in più forte u sintimu di culpabilità in leia cù i viaghji in aviò. Oramai, tutt’ognunu hè nant’à a via bona. 

E sfide rilevate nant’à i quattru siti

Da a banda di e piste, si hè buscata a piattaforma aiaccina duie passerelle muvitoghje d’imbarcu fatte sopr’à misura per e persone tocche da qualchì trampalu o di mubilità ridutta è chì viaghjanu cù l’energia sulare, cum’elle a feranu da quì à pocu e quattru passerelle classiche. Ùn hè mancu appena una cunversione urdinaria : hè u primu à u livellu mundiale l’aeroportu d’Aiacciu à rializà issa uperazione ! Seranu prestu dutati di LED i maghji di lume di i bastimenti è di i parcheghji per l’aviò, in quantu à a flotta automobile serà rinnuvellata per via di veiculi verdi, ibridi o elettrichi, chì oramai simu pronti. D’altronde, s’anu da fà in Aiacciu unepochi di travagli detti di «distratificazione» di l’aerogara per sparghje megliu u calore frà i primentre è riduce tandu di modu assai significativu a pruduzzione d’energia. Si pensa à una cullaburazione cù i Restos du coeur per issu 2023, da francà si a sperpera di robba à manghjà chì si pò sempre cunsumà, lampata cum’è frazu nanzu à l’imbarcu. In fine, hè stata attribuita à ogni agente una burraccia di metallu per limità l’usu di e stagnarine tutti i ghjorni. Esistenu parechje suluzione di pettu à a sfida eculogica, à quandu simplice è à quandu cumplesse, ma hè sicuru un affare : raprisentanu tutte u bon’ gestu per a pianeta !

Di fatti, hè sbuccatu in Bastia un grande pianu d’azzione nant’à i cinque anni à vene. Prevede u prugettu a cupertura sana sana di i parcheghji chì, al di là di u cunfortu offertu à l’avventori, risponde à dui scopi maiò : u slibramentu di paracarri di ricarica per e vitture elettriche è l’alimentazione di l’aviò in arretta in energie rinnuvellevule per via di una reta intelligente è di una architettura muderna. Un prugramma ambiziosu chì abbisogna a pruduzzione d’idrogenu verde sopra locu à parte da l’energia sulare. In più di quessa, permetterà issu gasu verde di rimpiazzà i gruppi elettrogeni prisenti nant’à e piattaforme è chì viaghjanu cù u fiulu da unepochi di gruppi elettro-idrogeni, una alternativa ideale à u dispusitivu cunvenziunale chì favurizeghja a perspettiva di una flotta di veiculi verdi è di un parcheghju aereu auto-nomu à u livellu energeticu. Anu da cuntribuisce st’avanzate à priservà l’integrità di a reta elettrica isulana è entrenu propiu in adequazione cù ciò ch’elle precunizeghjanu e pulitiche naziunale, europee è mundiale di a transizione eculogica chì facenu di l’idrogenu verde u puntellu di a lotta contru à l’emissione di gasi à effettu serra.

D’altronde, hà aderitu l’aeroportu di Figari, cum’è quellu di Calvi, à u prugramma Hop Biodiversité è raghjunghjenu di fatti quelli di Bastia è di Aiacciu. Tandu, indettanu l’aeroporti di l’isula un scopu ambiziosu, chì và cù u so tempu. Cum’elli facenu à tempu da porte d’entrata è da vitrine di u territoriu, hè tandu a maghjina di a Corsica inde u mondu chì si busca a luminosità.