A Lettera | E nove «linee» d’orizonte

A Lettera | E nove «linee» d’orizonte

Mette in ballu linee nove, frequenze nove è di a manera a più regulare è a più duraticcia pussibule longu à tuttu l’annu.

Eccu u scopu ch’ella seguita a CCI di Corsica cù u lanciamentu di un dispusitivu novu per incittà e cumpagnie aeree, da pudè seguità l’arricchiscimentu di a reta trà, da una banda, a Corsica è u cuntinente francese, è da l’altra banda, trà a Corsica è e distinazione strangere, in Europa, in u Mediterraniu è puru al di là.
Si sustituisce issa chjama à manifestazione d’interessu à quella, digià rivuluziunaria, utilizata mentre a crisa sanitaria, chì hà permessu à a Corsica di firmà cunnettata à l’in fora à u mumentu ch’ellu era ridottu u trafficu aereu à u so livellu u più bassu inde u mondu sanu. Per un’isula, ùn ci serà nunda di peghju chè un isulamentu furzatu. Averà salvatu issa iniziativa ardita, messa in ballu subbitu per u veranu di u 2020, una stagione più chè cumprumessa, in particulare per e filiere di u turisimu chì crea a maiò parte di u PIB mercante di a Corsica. Hè simplice u ragiunamentu. Ùn si cambia micca una strategia chì viaghja. À u cuntrariu, si deve piuttostu amplificà è perfezziunà cù a cunvinzione ch’ellu ci riserva torna bellissime surprese in e settimane chì venenu issu novu sistema incittativu è mubilizatore, chì ghjè cuncipitu per esse uperaziunale per a stagione di u 2023 !

I BATTIMENTI D’ALE…

Entre in cunfurmità u prugramma di incittazione finanziaria cù i traspurtori aerei, partendu è à distinazione di a Corsica, cù u quadru definitu da a Cummissione europea, è hà ricevutu l’accunsentu di a Cullettività di Corsica è di a Direzzione di a securità di l’Aviazione civile. Di manera cuncreta, cunsiste à prupone unepochi di sconti nant’à e tasse aeroportuarie, l’atteraghji è i passageri. Hè statu messu in ballu un meccanisimu precisu per una modulazione di ste gratificazione secondu parechji criterii : creazione di una linea nova o rinfurzamentu di una linea chì esiste, reta naziunale o internaziunale, i mesi di prisenza. Si buscanu un aiutu di più l’operatori chì sceglienu di cunnettà si à Calvi Santa Catalina per via di custrette specifiche imposte da a piattaforma. Hè previstu dinù una sorte di « bonus » per e cumpagnie chì riducenu propiu a so impronta eculogica è chì facenu di menu rimore. In corte parolle, si hè pensatu à tuttu da ch’ella sia cullegata a Corsica à assai cità, francese è strangere, è di u modu u più duraticciu pussibule nant’à tuttu l’annu civile. Una strategia chì face vince a nostra ecunumia.