A Lettera | TURISIMU : Un palazzu per una Scola « 5 Stelle »

A Lettera | TURISIMU : Un palazzu per una Scola « 5 Stelle »

 Hè pronta à esse lanciata a creazione di una Scola di u turisimu, di l’evenimenziale è di l’ospitalità. Da accoglie stu prugettu maiò, ci serà un locu marinu : u palazzu di i Cungressi, in Aiacciu.

 L’ambizione ùn hè chè l’ombra di u sognu, dicia Shakespeare. Anu a CCI di Corsica è a CMAR di Corsica un prugettu ambiziosu ch’elli sunnieghjanu di fà sorte di l’ombra. Un sognu chì puderia piglià forma da quì à pocu. U prugettu hè di creà una grande istituzione dedicata à a furmazione, à l’altura di e speme, di i bisogni è di a maghjina d’esemplarità ch’ella vole rinvià a Corsica, una Scola di u Turisimu, di l’Evenimenziale è di l’Ospitalità. Serà tuttu, fora di qualchì sognu di grandezza, l’idea chì face a so strada à u sboccu di duie realità, una realità naturale è una realità cunghjunturale. D’una banda, sta natura chì hà dipusitatu a Corsica in core à u mare Mediterraniu, u veculu di a Civilisazione diventatu à i tempi d’oghje una di e destinazione frà e più attrattive è e più prezzate in u mondu sanu. U so patrimoniu ambientale è a so biodiversità, a so storia è e so figure maiò, a so cultura è e so tradizione, a so universalità, chì hè stata un fanale nant’à e sponde umaniste di u Seculu di i Lumi, facenu ch’ella attira ogni sguardu nant’à ella. U so putenziale turisticu, cù un valore aghjustatu forte in quantu à l’irradiamentu internaziunale, hè a carta maestra di a nostra ecunumia : raprisentanu solu da per elle l’attività, dirette è indutte liate à u turisimu, guasi 40% di u PIB isulanu. È schjarisce appena di più l’orizonte a girata di a transizione eculogica ch’ellu neguzieghja u settore sott’à u cumandu di u Statu, di a Cullettività di Corsica è di a nostra camera.

Da l’altra banda, quella di a realità cunghjunturale, soffre dapoi un tempu troppu longu a Corsica di u turisimu da una piaga anziana ch’ella ùn riesce à guarisce : a difficultà guasi insupranevule di ricrutà è di fidelizà un persunale qualificatu è d’inquadramentu, fendu calà e speme, tante ricercate da i prufeziunali è da i puteri publichi, di stende a stagione nant’à ottu o nove mesi è risolve di fatti tutte e scunvenienze cagiunate da a sopra friquentazione. Invece, malgradu i sforzi accunsentiti in ogni parte è chì si ponu propiu ludà, ferma sempre troppu limitata a furmazione trattendu si à tempu di u vulume è di u livellu.

UNA OFFERTA PEDAGOGICA INNUVANTE 

Esaltà e vucazione, in particulare in a ghjuventù corsa, per i mistieri di l’albergu è di a risturazione ma apre dinù u campu di a furmazione à tuttu ciò chì face a ricchezza umana, patrimuniale, l’ospitalità – u valore cardinale trasmessu da leva in purleva – a gastrunumia è l’arte culinarie, a pesca è l’artisgianatu, ecc. 

Eccu a visione strategica purtata da stu prugettu di creazione di una Scola di u Turisimu, di l’Evenimenziale è di l’Ospitalità. Una scola chì ne permetterà l’eccellenza di acquistà cumpetenze à prò di un insignamentu chì sorte propiu da e vie tracunnisciute da chì ogni elevi possi, à traversu i sapè, spannà si à u livellu persunale. È chì parte a so offerta da l’amparera, arrimbata à unepochi di prugrammi diplumanti à a furmazione prufessiunale è cuntinua di prima trinca, chì serà pruposta prima è dopu à a stagione. Da seguità stu scopu, seranu urganizate di modu regulare i master class da chì e grande figure di i mistieri di l’osteria, di a risturazione è di l’evenimenziale, possinu arrecà, à traversu a so persunalità, un sapè fà unicu, chì sippia una sorza d’inspirazione è d’emulazione. Cascheranu appena, st’invitati di prestigiu integrati in u cursus di furmazione, cum’è u casgiu nant’à e lasagne. Chì ùn sò da cuncepisce i prugrammi d’insignamentu d’eccellenza ch’ella hà da prupone a Scola. Esistenu digià per a maiò parte è, di fatti, ùn averanu bisognu di passà per a fasa longa di l’ingenieria pedagogica o di aspettà e certificazione ufficiale. Classificate Erasmus, da u nome di stu dispusitivu europeu chì favurizeghja i sughjorni di studii per i giovani in furmazione inde un paese di l’Unione, sò pronti à esse impiegati, per via di u partinariatu messu in ballu cù duie istituzione di prestigiu : a famosa Scola osteriaghja di Avignon è a Scola superiore internaziunale di Savignac, di rinumata mundiale per a so singularità pedagogica, imitata da tant’altri dapoi tandu, chì cunsiste à prumove e qualità è i valori individuali di ogni amparante, chì sò cunsiderate cum’è una sopravaluta inestimevule di pettu à a stalca di e cunniscenze accademiche, chì ghjè cumuna per tutti. 

A SCELTA DI U SITU CUM’È UN’EVIDENZA…

Per accoglie sta Scola, ci vulia ch’ella si purtessi a scelta nant’à un locu spechju à l’altura di a so qualità è di e so ambizione. Hè parsu u Palazzu di i Cungressi d’Aiacciu cum’è u situ naturale ideale. Prima, per via di a so pusizione geugrafica, cum’è qualchì nave amiraglia armighjata per e cale di a Cità imperiale, po dopu perchè ch’ellu ghjoca l’edifiziu un rollu di prima trinca in u duminiu di a furmazione cunsularia è ch’ellu a si meriteghja una destinazione di più rimarchevule è di più rimarcata. 

À u livellu praticu, prisenta tutta a surfazia chersa per accoglie e sale di scole, l’attelli è i spazii tecnichi frà i quali un laburatoriu dedicatu à a cucina, à a pastizzeria è ancu un risturante d’appiecazione à l’ultimu pianu cù una vista chì ùn si pò caccià nant’à u mare da permette à i studienti di esse cunfruntati direttamente à e realità di i so mistieri futuri. Mistieri ch’elli anu da esercità, incù a lettera è u spiritu di u sviluppu duraticciu, u rispettu di a biodiversità, i circuiti corti, a dicarbunazione di l’attività…

Tenendu contu di l’impurtanza di l’accunciamenti da mette in ballu, si puderia imaginà l’apertura di a Scola, à u megliu, per a rientrata di u 2024.

Ùn hè a creazione di st’istituzione, chjamata à risplende nant’à tuttu u Mediterraniu è al di là, una fisima sulitaria ma una odissea cullettiva. Ùn ci hè da dubbità ch’elli seranu u Statu, à traversu l’Educazione naziunale, è a Cullettività di Corsica, i dui gran’ alliati di u prugettu, chì veneranu à aghjunghje ci l’Università Pasquale Paoli è parechji partinarii frà i quali si truveranu à u primu rangu a Cumuna d’Aiacciu è a CAPA, l’UMIH di Corsica, cum’è tutti l’urganisimi è l’intraprese chì contanu in u turisimu. 

Hè piantatu u decoru. Sò pronti à mette e mani in pasta tutti quelli chì ci sò impegnati è à avvià si nant’à a strada di a Scola…

ARTICLE PARU DANS L’ÉDITION N°31 (avril 2023) DE LA LETTRE – CCI DE CORSE