A lettera | L’INTERVISTA : « Si deve buscà a Corsica l’opportunità di una riforma custituziunale » Bruno Lemaire

A lettera | L’INTERVISTA : « Si deve buscà a Corsica l’opportunità di una riforma custituziunale » Bruno Lemaire

 Mentre a so ultima visita inde l’isula, più di quattru anni fà, hà prisentatu Bruno Le Maire l’auguriu ch’ella sia a Corsica, à l’ochji di tutti i paesi europei, u mudellu di una riescita ecunomica isulana. Torna oghje, face valè sta cunvinzione u ministru di l’Ecunumia è di e Finanze à a Lettera di a CCI di Corsica.

Anu vucazione e camere cunsularie di l’isula à passà sott’à tutella di a Cullettività di Corsica. Chì sguardu purtate nant’à sta sperimentazione legislative ch’è vo avete purtatu da l’iniziu ? 

Avemu ingagiatu, in fatti, a discussione cù a Cullettività di Corsica per esaminà a pussibilità di fà stu trasferimentu. Si tratta propiu di una evuluzione impurtante inde a cuntinuità di e dispusizione di a lege Pacte. Perchè impurtante, à parè meo ? Postu ch’ella hà per scopu di piglià in contu e specificità di l’isula è di rinfurzà a so cuerenza d’inseme inde a gestione di e pulitiche publiche è di e so risorze proprie. 

Serà pussibule ch’ella sippia generalizata sta sperimentazione ? 

Ciò chì eo possu accertà oghje chì ghjè oghje, hè chì ùn hè ancu à l’ordine di u ghjornu in altrò. 

Ci hè, di modu propiu obbiettivu, una rumpitura d’ugualità trà l’intraprese corse è quelle di u cuntinente, per via di i sopracosti cagiunati da l’isulanità. Ci vulerà un statutu fiscale specificu da pudè la riduce ? 

Si busca digià a Corsica parechji dispusitivi fiscali favurevuli chì anu per scopu di sminuisce l’incunvenienti cagiunati da l’isulanità è di sustene u so sviluppu ecunomicu : un scontu speziale di 25 % nant’à a tassa fundiaria, un creditu d’impositi per l’investimentu in Corsica o puru una reduzzione d’impositu à nome di i fondi d’investimentu di prussimità. Aghju tenutu propiu à cunfurtà sti dispusitivi inde a lege di finanze per u 2023 è aghju previstu un regime di tassazione specificu di e sopravalute immubiliare e più alte nant’à l’isula, da arrecà una suluzione di pettu à a sopra-speculazione. Ùn si tratta mai di qualcosa di stampatu in u marmaru. 

Una discussione, abbastanza difficiule, hè stata messa in ballu per ammintà a pussibilità di un statutu d’autunumia nant’à u mudellu di l’isule di u Mediterraniu. Cumu si puderia cuncretizà trattendu si di l’ecunumia ? 

Sò messe in ballu unepoche di discussione nant’à l’avvene istituziunale di a Corsica, cum’è vo a ramintate ghjustamente, è serà di fatti troppu prestu per caccià ne qualchì cunclusione. Hà dettu u Presidente di a Republica ch’ella si pudia imaginà una riforma custituziunale. Si tratta tandu di una perspettiva degna d’interessu. Si devenu buscà st’opportunità tutti l’attori di l’isula è di u cuntinente. 

Sottu à u vostru cumandu, hè statu rivalutatu u Creditu d’impositu Ricerca è Innuvazione è hè diventata a Corsica una Zona di sviluppu priuritariu. Seranu l’effetti à l’altura di u ministru chì avia bramatu di modu publicu ch’ella diventessi a Corsica, sò e vostre parolle, « un mudellu di riescita in Europa » ? 

Fate bè di ramintà ch’elli sò stati rialzati di modu propiu significativu i tassuli di u Creditu d’Impositu Ricerca è Innuvazione in Corsica per stu 2020 è ch’ella hè stata classificata l’isula sana cum’è una Zona di sviluppu priuritariu. Sò misure impurtante postu ch’elle permettenu à l’intraprese corse di avè un tassulu di 35 à 40 % – di pettu à 30 % in cuntinente – è à e piccule intraprese di benefizià di una esunerazione d’impositu nant’à i benefizii è d’impositi lucali. Fermanu troppu scunnisciuti sti dispusitivi. Chjamu di fatti e cullettività da ch’elli sianu valurizati è l’intraprese à ghjuvà si ne propiu ! Eppo a vi cunfermu, ùn si trattava mancu appena di qualchì parolla in l’aria, pensu chì a Corsica pò è deve diventà un mudellu di riescita ecunomica in Europa. 

Cù a garanzia di a Cullettività di Corsica, porta a CCI di Corsica u prugettu di creazione di una grande Scola di Turisimu. U sustenite ? 

Di sicuru ! S’o aghju una memoria bona, l’hà fatta nanzu à mè u Presidente di a Republica. Face parte a Corsica di e regione frà e più turistiche di Francia, ciò chì cuntribueghja propiu à a so ecunumia, è si impatrunisce di l’imbusche maiò di pettu à l’ambiente, chì l’anu da priservà. Per sustene sta attività è creà l’impieghi à u livellu lucale, avemu bisognu di furmà ghjente à l’accolta, à u serviziu, à l’osteria à un livellu di eccellenza. Cù Olivia Grégoire (a ministra delegata in carica di e PME, di u Cummerciu, di l’Artisgianatu è di u Turisimu, n.d.a.r), sustenimu di fatti ogni prugettu di creazione di una scola di turisimu chì sippia degnu di l’isula, è chì rispunderà à i so bisogni. 

Ùn v’avemu più vistu in Corsica dapoi un pezzu. Avete previstu di vultà ci da quì à pocu ? 

U più prestu serà u megliu ! Cunniscite u mo affettu prufondu di pettu à a Corsica. Ci sò sempre statu assai ben accoltu. 

Lire l'entretien en version française

ENTRETIEN PARU DANS L’ÉDITION N°32 (mars2023) DE LA LETTRE – CCI DE CORSE