A Lettera | Olivia Grégoire à a CCI di Corsica

A Lettera | Olivia Grégoire à a CCI di Corsica

 Femu ci a vita più faciule !

Hè u stridu di rallegamentu spartutu trà Olivia Grégoire, a ministra di u Cummerciu, di l’Artisgianatu è di u Turisimu, venuta à u scontru di l’intraprese chjuche è mezane per spiecà a so vuluntà di scaricà le di certi pesi amministrativi, è Jean Dominici, per u quale a riforma cunsularia hè ciò chì si face di megliu per a simplificazione…

L’idra di Lerna, u famosu serpu acquaticu di a mitulugia greca, cù i capi chì turnavanu à cresce sempre di più numerosi chè quelli chì omu tagliava, facia parte di a guardia avvicinata di Olivia Grégoire. Davant’à u so auditoriu di capi d’intrapresa stallati inde a sala di e deliberazione di u palazzu cunsulariu di Bastia, hà cunvucatu in fatti stu mostru policefalu per paragunà lu à e custrette di e norme di l’amministrazione francese. 

Sì pò moltu più riceve a metafora ch’ella hè aduprata da un membru di u guvernu, è in particulare da a ministra in carica di u Cummerciu, di l’Artisgianatu è di u Turisimu, u treppedi nant’à u quale riposa a maiò parte di l’attività ecunomica di a Corsica. Invece, ùn si sà ancu s’è i dispusitivi legislativi sperimentali ch’ella si vole mette in ballu subbitu à u principiu di l’annu novu per fà la finita seranu efficaci quant’è a frezza avvelenata sfrumata da Ercule mentre i so famosi Travagli, a vittoria di l’idra essendu u secondu, per esse precisu.

Ma, essendu difficiule di pudè misurà subbitu avà u so gradu di bravura, si pò digià incrucià i diti per a so riescita, chì mentre i decennii scorsi, i guverni successivi chì anu circatu à mette in ballu un « tusciu di simplificazione » si sò tutti impettati u muru. Ci hè da crede ch’elli sò belli zeppi i rettili venenosi di a gravità amministrativa è ch’ella ùn hè tantu pronta à mutà…

 « ÙN CI HÈ NUNDA DI PIÙ CUMPLICATU CHÈ DI SIMPLIFICÀ »

Un mese dopu à avè lanciatu una cunsultazione naziunale di l’attori ecunomichi nant’à a necessità di simplificà a vita di l’impresarii, hà trovu in Corsica Olivia Grégoire un aerupagu di l’ecunumia corsa propiu ricettivu di pettu à u so discorsu inde un periudu induv’elli passanu a maiò parte di i mercati per u filtru regiunale, naziunale è europeu di chjame à prugetti è induv’ella lancia a CCI di Corsica un fondu d’ingenieria destinatu à sustene, una filiera dopu à l’altra, e dimarchje di l’intraprese per risponde ci di valevulmente. 

Accugliendu a ministra, hà salutatu Jean Dominici e pruposte ambiziose di u so ospite è u so ingagiamentu inde l’allebbiu di e custrette amministrative chì pesanu in particulare nant’à l’intraprese chjuche è mezane : « Ma ùn ci hè nunda di più cumplicatu chè di simplificà ! Parechje anu pruvatu è pochi sò stati quelli chì sò riesciuti. Intantu, salutu u metudu ascendante ch’è vo avete adupratu, quellu chì ùn parte micca da un raportu ministeriale ma quellu chì ricolla da u terrenu. Sò da luntanu e più efficace e pulitiche di prussimità, quandu chì si tratta di megliurà a vita cutidiana di i capi d’impresa chì hè digià stata cumplicata abbastanza per chì ùn sianu aghjustate e cumplessità cagiunate da e transizione numeriche, ambientale è sucetale. »

Hà fattu casu u presidente di a CCI di Corsica di ùn munupulizà a parolla da chì a maiò parte di u tempu ch’ella hà assentitu a ministra à stu appuntamentu sia cunsacrata à i scambii cù i raprisentanti di e sfarente filiere. Per tuttu ciò chì tocca à a fiscalità è à i prugetti maiò chì sò stati messi in anda, cum’è per un dettu a scola usteriaghja, un ducumentu di fugliali di sintesi hè statu rimessu in manu propriu.

ARTICLE PARU DANS L’ÉDITION N°39 (janvier  2024) DE LA LETTRE – CCI DE CORSE

Lire La Lettre

ARTICLE DISPONIBLE EN VERSION FRANÇAISE

Lire l'article en français