A Lettera | Furmazione : “Amparà” piglia u so abbritu

A Lettera | Furmazione : “Amparà” piglia u so abbritu

U gruppu « Amparà Mediterraniu » natu da l’unione sacra di a CCI di Corsica è di a Camera regiunale di i Mistieri è di l’Artisgianatu hà da dà un slanciu salutariu à a furmazione nant’à u territoriu. 

Quellu chì ùn avanza micca ghjornu à ghjornu rincula ghjornu à ghjornu. Eppuru, basta à fidighjà a situazione di oghje ghjornu cù l’ochji di a fatalità per cuntrarià l’adasgiu è incittà à l’inerzia. L’anchilosi ecunomica, hè nanzituttu sta stagione chì hà dilusu, sò sti capi d’impresa, sti cummercianti è st’artisgiani chì strazieghjanu, un mercatu cuncurrenziale chì impiumba e mente è puru u spiritu d’iniziativa, è un’incertezza chì hà pisatu assai nant’à l’avvene di e stituzione cunsularie, puru s’ellu pare d’esse si in fine sgagiatu u celu… Ma ùn hè micca scrittu l’immubilisimu inde u patrimoniu geneticu di i dui presidenti, Jean Dominici è Jean- Charles Martinelli. Quand’elli piglianu una cria di rinculu, hè sempre per avanzà megliu ! Sta vuluntà forte è spartuta, chì hà digià arrecatu unepochi di frutti, si sprima torna oghje ghjornu inde u prugettu di creazione di un associu di mezi inde u duminiu di a furmazione chì hà pigliatu per nome « Amparà Mediterraniu. »

UNA FURMAZIONE CHÌ HÀ DA PASSÀ UNA GAMMA SUPERIORE

Sta marca nova cumuna, chì piglia à u livellu ghjuridicu a forma di un associu di a lege di u 1901, trà a CCI di Corsica è a Camera regiunale di i Mistieri è di l’Artisgianatu, risponde à tutti i criterii di u sviluppu persunale per via di u travagliu, di  l’amparera,  di  l’alternanza,  di  a  furmazione cuntinua, di a validazione di l’acquisti, di u bilanciu di cumpetenze, ecc. Cù, per fà da catalizadore, a missione di passà una gamma superiore in quantu à a qualità di e furmazione per i giovani, i salariati, i dumandatori d’impieghi è l’intraprese. Seranu d’altronde messe in ballu tutte e dimarchje utule à fiancu à l’istanze uffiziale è à l’urganisimi di certificazione sibulate per una ricunniscenza di u diploma à l’altura di u valore di l’insignamentu è di e cumpetenze dispensate è acquiste. Serà a cuncipitura d’arnesi è di moduli pedagogichi cumuni a prima grande tappa à francà ma si hà da trattà, dinù, di circà à custituisce prugrammi cù partinarii strangeri. Di modu parallelu, serà messa in ballu una campagna di cumunicazione è di prumuzione per assicurà a nuturietà, l’attrattività è a magina d’Amparà Mediterraniu à fiancu à i puteri publichi, à u mondu ecunomicu è à a pupulazione in generale. S’ella viaghja cun dui capi a marca è ch’ella hè attiva è spartuta a cullaburazione nant’à u fundamentu di scopi propiu definiti, si hà da tene ogni furmazione a so autunumia ghjuridica è bugetaria.

JEAN-CHARLES MARTINELLI : « IMPEGNATU À 1 000% ! »

« Ùn ci duvimu mancu appena lascià piglià da u scetticisimu ambiante, ci tocca à esse in permanenza inde l’azzione, cum’è no simu sempre stati mentre tuttu stu periudu mai compiu induv’elle sò successe e crise. Hè mentre stu generu di prove ch’elli facenu vede l’attori ecunomichi a so capacità à esse fiancu à fiancu. Anu propiu à core e duie camere di fà vede a strada di l’unione sacra. Cù a creazione d’Amparà, emettimu un signale forte di pettu à l’intraprese è à i giovani corsi chì anu per scopu di seguità un chjassu stantellatu per purtà li ver’di un avvene più sicuru è di più adattu à e so attese persunale è à i so raporti di pettu à u travagliu, chì mutanu cù a sucetà è l’imbusche di a pianeta », analizeghja Jean Dominici, chì si ralegra, quant’è l’inseme di u scagnu cunsulariu, di stu novu scalellu francatu inde u partinariatu cù a Camera di i Mistieri. Una suddisfazione chì viaghja inde i dui sensi, cum’elli l’accertanu i prupositi di u presidente Jean-Charles Martinelli : « Sò propiu ricunniscente di pettu à a CCI di Corsica chì ci hà assuciati di modu strettu à stu prugettu d’avvene per a ghjuventù corsa. Si hà da impegnà à 1000 % a nostra camera postu chì ghjè propiu essenziale di urganizà una furmazione d’eccellenza riservata di modu priuritariu à e filiere in tensione chì strazieghjanu à ricrutà i salariati chì anu da pudè, per via di stu partinariatu, acquistà e cumpetenze richerse. Hè Amparà a lucumutiva ideale per a Scola di u Turisimu, di l’Evenimenziale è di l’Ospitalità chì, a spergu, ùn serà micca attempata di più inde a so realisazione. » Sò finalizati i partinariati pedagogichi cù e scole usteriaghje di Savignac è di Avignon è ghjè cunfirmata a cumparizia di u Principatu di Monacu. « Hè prontu u buttone d’accesa è manca solu u ditu per appughjà nantu… », hà cunclusu Jean Dominici, cù un surrisu intesu. Serà battizatu di modu ufficiale u primu di ferraghju di u 2024 Amparà Mediterraniu. Serà albergata a so sede à u Palazzu cunsulariu di Bastia.

[vc_text_separator title=’In ranghi stretti’ title_align=’separator_align_center’ border=’no’ border_color=” background_color=” title_color=”

Hà da agisce Amparà per u contu di i centri di furmazione gestiti da a CCI di Corsica è da a Camera regiunale di i Mistieri è di l’Artisgianatu. Serà amministratu l’associu, per un periudu di trè anni, da un cunsigliu d’amministrazione ristrintu, cumpostu da ottu membri – quattru per ognuna di e duie camere aderente – è chjamatu à adunisce si omancu duie volte à l’annu. Averà in particulare per missione di elaburà è di mette in ballu a pulitica generale di l’associu à cortu, mezu è longu andà, è di prupone ogni azzione capace à favurizà u so sviluppu è u so splendore. Serà custituitu d’altronde un cumitatu di direzzione cù i direttori è i quadri di i centri di furmazione.