AMPARÀ MEDITERRANIU : Un’alba nova per a furmazione

AMPARÀ MEDITERRANIU : Un’alba nova per a furmazione

Una marca cumuna, un catalogu cumunu, siti è risorze spartuti : si mettenu in associu a CCI di Corsica è a CMA per rivuluziunà l’offerta di furmazione è turnà à generà e perspettive à prò di tutti l’attori di a nostra ecunumia.

Ùn perdu mai, eccu ciò chì li piacia à ripete à voli ne più Nelson Mandela, sia vinciu, sia ampargu. Amparà, ghjè cum’è prugressà, prughjettà si inde l’avvene per truvà ci un sensu à a so esistenza propria, custruisce si simpliciamente un prugettu di vita. Inde stu periudu d’incertezza, ùn hè tantu in gamba u murale per una ghjuventù isulana chì ùn hà tanti altri desiderii chè quellu di arrecà a so petra à l’edifiziu di una Corsica primurosa di rilevà tutte e sfide di i so tempi. Dinù, hè da marcà cù una petra bianca a data di u marti u 6 di ferraghju di u 2024. Hè u ghjornu di nascita di Amparà Mediterraniu, un associu di a lege 1901, un associu di vuluntà è di mezi, un associu trà a CCI di Corsica è a Camera regiunale di i Mistieri è di l’Artisgianatu, senza equivalente in Francia, chì hà da rivuluziunà l’offerta di furmazione, soprattuttu in direzzione di i giovani. Si hè tenuta l’assemblea generale custitutiva à u palazzu cunsulariu di Bastia. Apre a via à perspettive chì arrecanu unepoche di prumesse, persunale è prufeziunale, chì rivela a furmazione e cumpetenze è favurizeghja l’adempimentu di sè stessu. Ùn pudia micca sunnià di una indiatura più bella a nostra ecunumia.

« UN GRANDE MUMENTU PER A FURMAZIONE »

Rimudellatu cum’ellu hè statu da a riforma di u 2018, biasimata ella stessa da a Corte di i Conti per e so derive finanziarie, hè diventatu cuncurrenziale assai u mercatu di a furmazione. Hà attiratu un essame di prestatarii privati mutivati di più da a primura di a rentabilità chè da quella di l’interessu generale. Hè per quessa ch’ellu avanta Jean Dominici, cuscente di una situazione frustrante, un scambiamentu di paradigma ch’ella permette a creazione di Amparà : « Cunsistenu e nostre missione cunsularie à accumpagnà i nostri giovani è e nostre intraprese di pettu à e sfide chì si prisentanu à elli, ch’elle sianu tecnulogiche, ambientale o puru sucetale. Ci hà da rende di più forti è di più efficaci l’associu. Hà da accresce in qualità l’offerta di furmazione è dinù in quantu à u perimetru d’intervenzione, in particulare inde a creazione di filiere per i mistieri da u CAP fin’à u Bascigliè + 5, un orizonte chì ùn esistia micca fin’à i tempi d’oghje, avviati di più ver’di l’innuvazione, l’energie rinnuvellevule, a rinnuvazione di i bastimenti, a mubilità pulita, ecc. Si tratterà dinù di riesce inseme u prugettu ch’è no ammintemu dapoi parechji decennii è chì hà da vede in fine u ghjornu : l’apertura, toccu a rientrata di u 2025, di a Scola di Turisimu è di l’Ospitalità in Aiacciu, in partinariatu cù a Cullettività di Corsica. » Si ne stà nant’à a listessa via Jean-Charles Martinelli : « Hè un grande mumentu per a furmazione. Tutte e perpettive prumesse à i nostri giovani anu da ralentà a partenza di e nostre forze vive. Ma si face sta cuuperazione in direzzione di a ghjuventù à prò di e nostre intraprese, di i cummerci è di l’artisgiani », assicureghja quellu chì hè statu designatu à l’unanimità à a presidenza di l’associu.

UNA NOVA INGENIERIA PEDAGOGICA

Oghje ghjornu, hè cumplessa, disurdinata è pocu capiscitoghja l’offerta di furmazione. Li hà da rende di più accessibile è di più leghjitoghja l’elaburazione di un catalogu cunghjuntu diffusu largamente. I trè scopi principali da mette in ballu cunsistenu à : 1. Mutualizà e risorze umane, i mezi, i siti ; 2. Cuncepisce una nova ingenieria pedagogica per l’amparera è l’insignamentu, fundata nant’à a crescita in gamma qualitativa è a prussimità ; 3. Esse assai di più reattivu di pettu à l’attese di u terrenu ecunomicu – è sò e duie camere à e prime piazze per fà ne u censu – è di fatti facilità u travagliu di a Cullettività di Corsica inde l’evuluzione di a carta di e furmazione. Ci vulerà in u listessu tempu accumudà si di l’instabilità legislativa inde stu duminiu è di una cuncurrenza di più in più feroce, ch’ella sia fisica o virtuale. Hè Amparà Mediterraniu una marca cumuna per una offerta cumuna nant’à l’inseme di u territoriu isulanu per a furmazione cuntinua, l’alternanza, a validazione di l’acquisti è u bilanciu di e cumpetenze. Hà vucazione à risplende à u livellu internaziunale per via di cunvenzione cù i partinarii strangeri. Hà da mette si in ballu oramai una campagna d’infurmazione per assicurà a so nuturietà. L’unione di e duie camere cunsularie, hè l’unione di a parolla è di l’azzione, l’unione di a Corsica è di a so fede inde u so avvene.

ARTICLE PARU DANS L’ÉDITION N°41 (février  2024) DE LA LETTRE – CCI DE CORSE