04 95 54 44 44
A lettera | INCHIESTA NAZIUNALE OPINIONWAY : Classifica naziunale di e CCI A Corsica in testa
Sò stati palisati i risultati di l’inchiesta naziunale di perfurmanza per u 2022 è si busca a CCI di Corsica a prima piazza nant’à u trastatu, postu ch’ella hè a più efficace per accumpagnà l’intraprese. Una distinzione da sparte di modu cullettivu…
`
Cù 77 % d’intraprese assai suddisfatte in Corsica, contru à 48 % per a media naziunale, hè impurtante assai u scartu quist’annu. A ricerca di finanziamentu per l’innuvazione o a criscenza, l’inves-timentu inde e transizione numeriche è/o eculogiche, u sviluppu cummerciale, a creazione d’intrapresa. Eccu u censu di a maiò parte di e ragione per e quale anu sullicitatu a camera di u cummerciu è di l’industria l’intraprese di Corsica per stu 2022, per avè cunsiglii avvisti è un accumpagnamentu d’ogni ghjornu per ogni tappa di u cartulare.
Raprisentanu a ricerca di fondi è e trasfurmazione rilative à l’eculugia è à u numericu più di 80 % di e sullicitazione. Ma si trova l’insignamentu u più spettaculosu è u più gratificante per a nostra istituzione in u livellu di suddisfazione ch’ellu sulleva u pannellu di e prestazione arrecate da u so impegnu. Hè bellu più altu in Corsica chè à u livellu naziunale postu chì a nota glubale hè di 9,1 nant’à 10, vale à dì un puntu di più chè a media francese. Per stà si ne inde l’aria di i nostri tempi, si puderia parlà d’una certa manera di l’equivalente di u Bascigliè, chì seria statu chjappu da u primu colpu cù e felicitazione di a ghjuria !
Ma hè puntellata sta nota rimerchevule di 9,1 di manera precisa precisa da l’inchiesta di Opinionway. Si spieca per via di parechji fattori. Di fatti, culmineghja a nota rilativa à l’accumpagnamentu à 58 % di utile assai in Corsica, contru à 37 % per a media naziunale.
Per ciò chì tocca à a rapidezza di a presa in carica è di a regularità in u seguitu di e dimarchje, si trova torna in testa è da luntanu a CCI di Corsica.
Si tratta dinù di l’efficacità. Mettenu in avanti un quartu di l’intraprese l’ottenimentu di un sustegnu finanziariu à u sviluppu contru à 12 % inde a Francia sana. Osinnò, sò e trè azzione e più sparse messe in ballu, inde l’ordine : l’investimentu, a megliurazione di l’urganisazione interna è l’allarghera di a clientela.
D’altronde, quì dinù, tocca u puntu u più altu a nota di ricumandazione di a CCI di Corsica à 9,1/10 cù 59 % di l’intraprese corse chì attribuiscenu a nota massimale di 10 contru à 34 % per a media naziunale, vale à dì guasi u doppiu.
Fatta fine, hè a CCI di Corsica a più perfurmante di tutta a reta cunsularia naziunale. Ùn si tratta mancu appena di qualchì risentitu, ma di un acquistu accertatu cù a prova scentifica. Ma attenti, chì ùn conta mancu appena di lascià si andà !
A migliore di e regularità, hè u travagliu. Ci vole à crede ch’ella si ispira ognitantu a CCI di Corsica da i precetti di Victor Hugo. A regularità è a perseveranza, eccu e duie parolle maestre chì avvianu a nostra azzione. È st’azzione, puru s’ella ci piace di modu cullettivu à mette la in ballu incù una squadra è à spessu luntanu da i pruiettori mediatichi, hè vista, ricunnisciuta è trova ancu un plebiscitu à u livellu naziunale. Di fatti, per a terza annata di fila, ma di modu ancu più nettu, si alza a nostra CCI à u primu rangu di e CCI di Francia inde una disciplina chì puderia esse olimpica tantu ch’ellu hè difficiule u cuntestu è ch’elle sò numerose e prove da supranà : l’accumpagnamentu di l’intraprese.
Ùn hè micca sta perfurmanza a cun-clusione autosuddisfatta di un studiu internu più o menu cumpiacente ma u risultatu di l’inchiesta di perfurmanza indipendante rializata da l’istituzione di sundame Opinionway, rinumata à u livellu internaziunale per a so affadabilità, à a dumanda di CCI di Francia.
Puderia esse qualificatu di surprendente stu risultatu, ludatore assai, tenutu contu di i trampali è di l’inugualità ch’ellu pate u nostru territoriu, s’è ùn pigliavamu micca in cunsiderazione a qualità di guvernanza è a ghjustezza di e scelte di a nostra istituzione è di l’inseme di i so eletti, l’indiatura cunvinta di e nostre squadre à ogni livellu è, bella sicura, a cunfidenza di i nostri sudditi.
Sta ricunniscenza naziunale, ùn a mi sentu di dì sta medaglia d’oru, sò fieru di sparte la cù tutti. Hè assai di più chè qualchì trufeu, hè un argumentu di pesu, chì ùn si pò rifutà, da mette nant’à u tavulinu di e discussione di l’evuluzione statutaria di a camera per u più grande benefiziu di l’ecunumia di a Corsica.
ARTICLE PARU DANS L’ÉDITION N°33 (juin 2023) DE LA LETTRE – CCI DE CORSE
Lire La Lettre