A lettera | Li tiremu u nostru cappellu !

A lettera | Li tiremu u nostru cappellu !

Anu ricevutu sessanta laureati di a prumuzione 2022 u so diploma di fine d’annata inde un’ambianza festosa. Frà elli, parechji anu da fà i so primi passi inde u mondu di l’intrapresa, d’altri s’approntanu à seguità i so studii superiori…

Ùn si ghjoca solu sott’à i splendori di u castellu di Versailles l’avvene di a Corsica, s’ella hè stampata l’impronta di a Corsica inde u marmaru di a Custituzione. L’avvene, hè dinù u Campus Furmazione di u Borgu, chì face campà è ingrandà a nostra Scola di u Cummerciu è di u Maneghjimentu Corsica – Kedge Business School. L’avvene, sò sti giovani vestuti da una toga nera è da un cappellu vultighjadore, chì anu ricevutu u so diploma ghjovi u 29 di ghjugnu inde l’orti di u situ, una prima volta per stu genneru di ceremonia chì, puru prutucullare ch’ella sia per via di a forma, u rituale, i discorsi, u paratu visuale, hè stata dinù festosa assai è carca à facce radiante, postu ch’ella hè u fruttu di un cursus propiu prufeziunalizante.

A si meriteghjanu ancu ch’è no li tirghimu u nostru cappellu una volta di più i sessanti laureati venuti da i sei prugrammi BTS/Bachelor. Sò di a prumuzione di u 2022, quella chì hà impettatu di fronte u virus, i cunfinamenti successivi, i corsi in distanziale quand’ella era pussibule. Ùn hè mancatu Pascal Agostini, u direttore di u stabilimentu cunsulariu, di ramintà di manera publica stu cuntestu propiu particulare, cum’ellu l’hà fatta, à a tribuna, è cù unepoche di parolle calurose è chì incuragianu, Jean-François Paoli, u presidente di a Cummissione Furmazione di a camera. In quantu à u prefettu di u Cismonte, Michel Prosic, chì ci tenia à esse prisente à a ceremonia, hà salutatu a qualità di a furmazione, u dinamisimu di l’intraprese corse, in quantu à a resilienza è à l’innuvazione, è ramintatu ch’ella avia propiu per ambizione tutta a pulitica di u Statu in Corsica, di avvicinà si à una situazione d’impiegu pienu. 

Fendu u censu di i sessanti diplumati di u Cismonte, si trova una maghjurità di donne giovane, ciò chì vene à attestà di e cunvinzione prufonde di a CCI di Corsica in quantu à l’ugualità è puru al di là trà e donne è l’omi. Anu da pusiziunà si sei diplumati nant’à dece nant’à u mercatu di u travagliu, diventà quadri o creà a so intrapresa. L’altri seguiteranu i so studii superiori, agguantendu inde u pannellu di e spezialisazione (marketing digitale, business è sviluppu, gestione di prugetti, ecc.) sia à u Campus di u Borgu, chì accoglie l’amparanti fin’à u Bascigliè + 5, sia à l’Istitutu d’amministrazione di l’intraprese di l’Università di Corsica, sia in Cuntinente in cerca di un Master inde una Grande scola di cummerciu. Intantu, dopu à u tradiziunale « lanciu di cappelli », anu apprufittatu di l’orti di u Borgu per una notta musicale, ancu di più annacquata chè e piante, almanaccata à posta à a so intenzione ma dinù à quella di i so amichi è di e so famiglie.

Bone vacanze à tutti è cappelli… bassi !

Article disponible également en version française

ARTICLE PARU DANS L’ÉDITION N°33 (juin 2023) DE LA LETTRE – CCI DE CORSE