A Lettera | EMMANUEL MACRON IN CORSICA – Jean Dominici : « Participà di modu attivu à a seconda fasa di u prucessu »

A Lettera | EMMANUEL MACRON IN CORSICA – Jean Dominici : « Participà di modu attivu à a seconda fasa di u prucessu »

À u capu di una delegazione d’eletti cunsularii, hè pussutu ragiunà qualchì minutu u presidente Dominici cù u capu di u Statu, chì li hà assicuratu ch’ella serebbe torna sustenuta è accumpagnata l’ecunumia di a Corsica per i mesi è l’anni à vene.

Lire l'article en version française

• À a tribuna di l’Assemblea di Corsica, hà parlatu Emmanuel Macron di una « stonda storica. » Serà dinù u vostru parè ?

Riteneremu di sicuru i prupositi di alta tenuta scambiati trà a presidente Maupertuis, u presidente Simeoni è u Presidente di a Republica, ma serà marcata a storia di manera indelebile è prufonda solu quand’elli veneranu i fatti dopu à i discorsi è e realità dopu à e prumesse. Hè puntellatu l’orizonte, avemu pigliatu un appuntamentu da quì à sei mesi per ch’elle sianu messe in ballu di manera cuncrete e riforme annunziate, per ch’elle sianu capite l’imbusche è e sfide ecunomiche è purtate di manera efficace ver’di l’avvene, tantu per i nostri sudditi d’oghje chè, torna di più, per i nostri giovani chjamati à succede ci. A storia, a grande, sò elli chì l’anu da campà è chì l’anu da scrive.

• Cù unepochi d’eletti di a camera, in piazza San Niculà, avete voi stessu ragiunatu una stonda cun ellu. Era impurtante di stabilisce u cuntattu ?

Iè, di sicuru. Simu impegnati dapoi un pezzu à favore di un dialogu francu è apertu trà i raprisentanti di a Corsica è u guvernu, in particulare è soprattuttu quand’elle eranu pessime e rilazione. Ùn ponu esse cattive a Corsica è a so ecunumia di e tensione è di l’incumpreensione, a sola via hè quella di u rispettu da ogni parte è di a custruzzione cumuna. U Presidente di a Republica, propiu à capu di a situazione isulana, hà datu i migliori segni per apre e perspettive ch’è no aspettavamu. 

• Hà dumandatu à a delegazione cunsularia di travaglià per fà pruposte da quì à sei mesi. Cumu cuntate di urganizà vi ?

Simu digià urganizati è mubilizati dapoi un pezzu, ch’ella sia inde a nostra istituzione o cù i nostri partinarii di u Cullettivu di i raprisentanti di u mondu ecunomicu corsu. Ramentu dinù ch’elli anu permessu i studii GoodWill Management di u 2018 è di u 2019 di legittimà u Creditu d’impositu per l’Investimenti è u studiu EY nant’à a strutturazione di l’ecunumia è u rilanciu dopu à u Covid. Avemu da prulungà sti travagli è participà di modu attivu à a seconda fasa di u prucessu cù a Cullettività di Corsica è u guvernu, senza lascià corre mancu una stonda i cartulari è i sugetti cunghjunturali di i tempi d’oghje. Serebbe, in fatti, propiu strampalatu di appruntà l’avvene senza guarantisce u prisente è in fine di « more guariti » s’è, per un dettu, ùn hè micca appruntata è avviata megliu a stagione turistica di u 2024 chè quella di u 2023.

• Avete mandatu à l’Élysée un ducumentu nant’à e « Sfide di a messa in mossa. » Chì ne sperate di manera priuritaria ?

Hè un cartulare chì deve esse capitu cum’è un puntu d’entrata cù, d’una parte, una mostra d’inseme di e difficultà è di e custrette specifiche ch’ella deve affruntà l’ecunumia corsa è, da l’altra banda, e sfarente piste per cumpensà le, arrimbendu si à i mezi di a fiscalità è à regimi di sustegnu specifichi. Ammenta dinù i prugetti maiò per l’avvene ma ùn hè mancu appena compiu u listinu.

• Hà annunziatu in u so discorsu u Presidente di a Republica un PTIC di nova generazione. Chì ne aspettate, in particulare per a mudernisazione di i porti è di l’aeroporti ?

Viaghjanu i nostri porti è assicureghjanu ogni ghjornu i scambii, tutti i scambii trà l’isula è u restu di u mondu, è di fatti guarantiscenu l’ossigenazione di a nostra sucetà isulana. L’avemu fatta vede in ogni circustanza è ghjè ricunnisciutu stu travagliu à u livellu u più altu cum’ella l’hà palisatu, per un dettu, a Corte di i Conti quist’annu trattendu si di a rubustezza è di a pertinenza di u sistema aeroportuariu. Di manera generale, tuttu què ùn ci pò fà scurdà a necessità è ancu l’esigenza d’investisce, di mudernizà, di raziunalizà, di megliurà l’inseme di l’infrastrutture, d’integrà e tecnulugie nove è l’ecchippamenti di punta. Hè in avanzu a Corsica inde tutti sti duminii. Non solu u deve firmà ma deve dinù accresce sti sforzi inde stu registru vitale per perfurmà inde i decennii chì venenu.

« U Presidente di a Republica hà datu i migliori segni per apre e perspettive ch’è no aspettavamu. »

Tuttu què ùn ci deve alluntanà non più da i salti generaziunali chì ci tocca dinù à francà o richjappà cù i prugetti di Portu Novu in Bastia o di u fondu di cala in Aiacciu, ma pensu dinù à l’aeroporti chì devenu tutti esse megliurati ; in particulare a piattaforma di Figari chì s’hà pigliatu i ritardi d’investimenti i più impurtanti.

• Malgradu tuttu, ùn site dilusu ch’ellu ùn appia ammintatu di manera più cuncreta u capu di u Statu in u so discorsu e difficultà è l’attese specifiche à l’ecunumia di a Corsica, u mudellu novu ch’è vo purtate ?

Innò, chì pensu chì ùn era nè u locu nè u mumentu. Ma hè statu appruntatu u terrenu è, cù a cunfidenza stallata è l’appaciamentu ritrovu, hè venutu oramai u tempu di custruisce un’ecunumia di più aperta à e generazione nove, di più resiliente è diversificata, resa più soda per fà fronte à e transizione numeriche, ambientale è sucetale… Nanzu à tuttu què, ci vulerà à ricunnosce, à adimette è à currege e difficultà è e custrette di l’isulanità per mette à parità e nostre intraprese è i nostri cummerci cù quelli di u cuntinente, ramentu chì raprisenta trà 9 è 12 % di u sciffru d’affari secondi i settori è chì si tratta di un scartu impurtante, in particulare quand’è no simu sposti à e crise è à i svultulimi di cunghjuntura. Ùn hè micca accettevule di lascià i capi d’intraprese isulani, cummercianti è artisgiani, soli di pettu à sta situazione chì ùn hè micca equitativa. Ùn deve micca perdurà, ci tocca à scambià d’era…

« A sola via pussibule hè quella di u rispettu d’ogni parte è di a custruzzione cumuna »

 

• In Portivechju, intantu, hè statu dettu ch’ella avia l’isula « assai perspettive ecunomiche », ammintendu e parolle d’« ecunumia turchina » è di « turisimu duraticciu ». V’averà rassicuratu ? 

Iè, chì m’hà dettu ancu persunalmente u Presidente di a Republica, è di visu, ch’ellu cuntinuerà u Statu à accumpagnà l’ecunumia di a Corsica, pocu impreme ciò chì accaderà, è sapemu ch’ellu hè vigilante è attentu à tutti i sugetti ecunomichi ch’ellu ammaestreghja di manera perfetta. Li aghju rispostu ch’ellu pudia cuntà nant’à u mondu ecunomicu isulanu in generale è nant’à a CCI di Corsica in particulare per afferrà ste perspettive è urganizà a nostra messa in mossa inde u prucessu di dialogu è puru al di là.

•  Site statu propiu recettivu à a so vuluntà di arradicà di più a Corsica in u Mediterraniu ? 

 Di sicuru ! Purtemu digià iniziative è parechji prugetti inde stu duminiu dapoi un pezzu, venimu d’altronde d’esse laureati di dece prugetti di cuuperazione in u Mediterraniu è cuntemu propiu di rinfurzà u nostru impegnu inde sta direzzione. D’altronde, l’ultima scheda di u cartulare ch’è no li avemu rimessu hè cunsacrata sana sana à a piazza ch’ella puderia occupà a Corsica inde u Mediterraniu per l’anni à vene. Inde tutti i so discorsi, ci face riferenza u Presidente di a Republica è ghjè propiu bon’ segnu.

 

ARTICLE PARU DANS SA VERSION FRANÇAISE  – ÉDITION N°36  (octobre  2023) DE LA LETTRE – CCI DE CORSE

Lire La Lettre