A lettera | Sustegnu à i cummercianti : U più à a…prussimatà
In partinariatu strettu cù l’Adec, manifesteghja più chè mai a CCI di Corsica a so sulidarità cù i so sudditi chì facenu campà l’ecunumia lucale è, inde stu scopu, rinnuvelleghja un sustegnu finanziariu indeffettibile à l’unione è à l’associi di cummercianti di u territoriu.
Ci serà vulsutu una crisa sanitaria inedita per ch’ella torni à scopre a pupulazione, attratta cum’è a calamita da e grande insegne periferiche è internet, i vantaghji insegni di i cummerci di prussimità. I cummercianti elli stessi, di e cità è di i paesi, l’anziani stallati da anni è anni cum’è a leva nova impegnata inde l’ecunumia lucale, si sò dati di rimenu è anu fattu a prova d’ingeniusità per permette à l’abitanti di traversà u megliu pussibule e prove di a pandemia è di u cunfinamentu. Una prisenza è iniziative chì seranu state benefiche per nutrisce si, veste si, curà si, campà simpliciamente ogni ghjornu ma dinù à u livellu, propiu di primura, di u murale…
« ÙN SI TRATTA MICCA DI CAPPIÀ I SFORZI »
Ma ùn hè stata a surtita di u Covid, per l’artisgiani è i cummercianti, una spassighjata di piacè. Si parlerà ancu di un eufemisimu. Si hè cumbuttatu tuttu per una ripresa di l’attività mezu fatta, mezu da fà : a debbulezza di i ricaschi ecunomichi per vie di e stagione di statina cuntrariate, l’abitudine più o menu imposte di e spese in linea, a calata mai stanciata di u putere di compra, a crisa energetica, a morosità ambiente, nutrita da i cunflitti à e porte di l’Europa fin’à l’Uriente Vicinu.
« Hà bisognu più chè mai u cummerciu di prussimità di u sustegnu di a pupulazione è di i puteri publichi. A si meritanu l’anziani cum’è i giovani chì facenu campà l’ecunumia cù un curagiu d’innasta degni di lode, di esse ricunfurtati è incuragiti. Da sempre hà manifestatu a CCI di Corsica un sustegnu indeffettibile à i so sudditi è ùn hè mancu appena inde un periudu particularmente difficiule ch’ella hà da cappià i so sforzi. Quist’annu, in adequazione perfetta cù a Cullettività di Corsica, avemu attribuitu suvvenzione impurtante à l’unione cummerciale è à l’associi di cummercianti chì opereghjanu dapertuttu inde l’isula è avemu da cuntinuà à fà la… »
Face riferenza in particulare u presidente Dominici à a cunvenzione chì cullega a camera cù l’Agenzia di u sviluppu ecunomicu di a Corsica per sustene u cummerciu di prussimità ma dinù a participazione à e fiere è à i saloni. Hà raprisentatu un inviluppu di prima trinca di più di 300 000 eurò. Un aiutu apprezievule senza u quale anderianu e cose ancu
di più male ch’elle sò…
PIÙ VICINU, PIÙ UMANU, PIÙ ECULOGICU…
Al di là di a CCI di Corsica, chì hà fattu di u sustegnu à l’ecunumia lucale u core di u so mistieru, un core chì batte tutti i ghjorni, anu pigliatu propiu cuscenza a cumunità isulana in generale è e cullettività lucale in particulare di l’interessu inde e nostre vite di ciò ch’omu chjama imprupriamente i « picculi cummerci » postu chì quand’elli rendenu servizii preziosi, pare propiu strampalata a nuzione di « picculu. »
Ma hè a pupulazione elle stessa chì hè turnata à scopre e virtù di i cummercianti chì si trovanu inde u so ambiu vicinu vicinu è chì, di fatti, pò ghjucà propiu u so rollu è sprime tutta a so utilità. In fatti, cumprendu à u livellu lucale, si cuntribuisce à colpu sicuru à fà campà a so cità, u so carrughju, u so paese. Spende i so soldi inde i cummerci lucali, solu cù a misura ghjusta di i so mezi, puru mudesti ch’elli sianu, vole dì fatta fine investisce inde a so qualità di vita propria è, per via di un effettu di capillarità, annacquà tutta l’ecunumia lucale.
Quand’elli fermanu corsi, visitati, animati, i centru cità, vole dì chì, d’una certa manera, si tramanda una storia, una lascita, si mantene a cuntinuità di e rilazione d’una leva à l’altra. Chì al di là di l’aspettu propiu ecunomicu, arreca u cummerciu di prussimità una dimensione umana di un valore chì propiu ùn si pò ancu suspettà. Ùn si tratta mai, cum’è altrò inde i grandi gruppi, di fà piglià a suprana à l’uttimisazione di i benefizii o a distribuzione di i dividendi, ma di mette à prufittu a so « dimensione umana » per rende l’accolta calurosa è u cunsigliu persunalizatu, cultivà a leia suciale per via di i scambii urdinarii quant’è l’evenimenti di l’attualità, e previsione meteurulogiche è puru intime quandu chì omu chere e nutizie di a famiglia, zitelli, parenti è caccari chì francanu o anu francatu u listessu zigliare. In fine, face prò simpliciamente à a pianeta u cummerciu di prussimità. Inghjenna di menu trasportu chè a periferia è a vendita in linea, pruduce di menu imballasgi, si digitalizeghja è si rende di più accessibule.
Ecunumicamente, eculugicamente è à u livellu umanu, hè, per dì la in corte parolle, attenziunutu. Sò tante cagione per mantene lu in vita è sviluppà lu inde u paisaghju famigliare di a nostra vita d’ogni ghjornu.
Circa vinti cinque unione cummer- ciale ammaglianu u territoriu isulanu. Si alza di modu precisu u sustegnu tutale arrecatu da a CCI è da a Cullettività di Corsica à 312 000 eurò per l’annu 2023. Un accumpagnamentu finanziariu chì serà rinnuvellatu l’annu chì vene, in più di l’aiuti puntuali per parechje azzione di prumuzione cum’ellu serà u casu per e feste imminente di a fine di l’annu secondu e mudalità chì seranu definite da quì à pocu. Ùn hè mancu appena à casu a scelta d’aiutà l’associi di cummercianti. Facenu sente a voce di i so aderenti à fiancu à i puteri publichi è anu un rollu di prima trinca per chjarisce u sguardu di i decidori nant’à a circulazione, a mubilità, a pedunisazione è di modu più generale nant’à l’accunciamenti urbani, in particulare à l’uccasione di campagne di prumuzione, permettenu dinù di definisce strategie cumune è di facilità ne a messa in ballu per via di a mutualisazione di i mezi. Inde tutte ste missione è e so prese d’iniziative, cù un inventariu chì ùn hè mancu appena esaustivu, sò energiche è perfurmante l’unione è l’associi corsi. Esse à fiancu à elle, vole si dì stimulà tutta l’ecunumia lucale di a Corsica.
ARTICLE PARU DANS L’ÉDITION N°37 (novembre 2023) DE LA LETTRE – CCI DE CORSE
Pour lire l’article en version française : cliquez ici
Lire La Lettre