A Lettera | Stretti cum’è i diti di a manu

A Lettera | Stretti cum’è i diti di a manu

Firma di un protocollu di accunsentu trà cinque partinarii per mette in ballu un prugramma di accunciamentu di una ampiitudine mai vista inde a cala di a cità imperiale : u Statu, a Cullettività di Corsica, a Cumunità d’agglumerazione di u circondu aiaccinu (CAPA), a cità di Aiacciu è a CCI di Corsica. Un’allianza propiu inedita…

Ramentanu u fiume tumultuosu di i dibattiti publichi nant’à tutti i terreni pussibuli è chì si ponu imaginà è u rumanzu di ribatti di e ghjustre pulitiche à chì puntu hè pronta a Corsica à cede cù ghjubilazione à a cumpetizione, à a cuntruversa à l’azzetti di ogni natura chì attizzanu a cronaca. Intantu, face da eccezzionedi pettu à a regula u prugettu di accunciamentu di l’intrata di a cità d’Aiacciu chì, di prima vista, ùn hè micca un affare di sopravivenza per a Corsica : quì, l’anu fatta finita tutte e divergenze ideulogiche è l’attraenza atavica per l’azzuffi di paesi. U fattu si stà ch’ellu hè purtatu oramai di modu cullettivu da i puntelli maiò à u livellu amministrativu, puliticu è ecunomicu di a Corsica u prugettu di metamurfosa di a cità imperiale, da i so carrughji pupulari di a periferia fin’à a cità storica, passendu per u bor’di mare è u portu di cummerciu. Un scenariu ineditu chì ci pò lascià pensà in fine chì, per l’avvene, si hà da affirmà

 «  UN PARTINARIATU SINCERU È SENZA DUGMATISIMU  »

Si hè fatta a ceremonia di a signatura, cum’ellu si deve per cunferisce a sulennità richiesta à l’evenimentu, inde i saloni napuleuniani di a casa cumuna di Aiacciu. Hè stata seguitata da una cunferenza di stampa per mette à palesu e linee maiò di un prugramma di un’ampiezza maiò incù un scopu chì omu puderia riassume in qualchìparolla : ristabilisce a cunnezzione trà a citàmuderna, a cità anziana è u portu. Ma si hè trattatu soprattuttu è nanzituttu, in a sala di u cunsigliumunicipale Charles-Ornano, di u partinariatu forte messu in ballu per ghjunghje ci à u favore di una sianza di travagliu induve ogni parte hà fattu a so dichjarazione d’intenzione incù a calambria di un ghjuramentu. Si principia cù u più interessatu di tutti, u merre di Aiacciu, per u quale hè stu prugettu un vechju serpu marinu chì esce in fine u capu di l’acqua : « un prugettu chì mubilizeghja tutte l’imbusche maiò di u seculu, l’equilibrii di u territoriu, a mubilità, i trasporti, l’ambiente, l’ecunumia. Nant’à u fundamentu di una urbanisazione ammaestrata male, avemu da dà un sensu à l’urbanisazione cù una dimensione multimudale chì hà da megliurà a vita d’ogni ghjornu di l’Aiaccini. È per u bè di u nostru territoriu è di tutta a Corsica, a femu inseme, adduniti, mettendu in forma oghje ghjornu un partinariatu sinceru per via di u quale ci puderemu dì tuttu, senza tabù è senza dugmatisimu », si ralegra Stéphane Sbraggia, chì inalbora dinù a beretta di presidente di a CAPA. Si ralegra Gilles Simeoni dinù ellu di u caratteru unitariu innuvante, per ùn dì revuluziunariu, di a dimarchja : « sò nurmale e sfarenze pulitiche è ancu puru salutarie in demucrazia è femu oghje a scelta di ingagià ci inseme nant’à un chjassu cumplessu quant’è prumettente… »

« CI VOLE À PENSÀ LUNTANU È AGISCE IN PRUSSIMITÀ »

Eppuru ùn si ciotta micca u presidente di u Cunsigliu esecutivu inde un statu estaticu. Ramenta e custrette bugetarie forte di a Cullettività di Corsica : « Averemu da fà unepochi di arbitragii ma, à ogni tappa, vi accumpagneremu u megliu ch’ellu serà pussibule. A trasversalità chì entre in ghjocu oghje hè un casu di scola, una sfida per noi tutti. Ci tocca à rilevà la, fendu a prova di l’efficacità à longu andà. È s’ellu hà stu prugettu un valore di esemplarità per d’altri prugrammi di accunciamentu di u territoriu altrò in Corsica, seremu riesciuti dinù sta scumessa difficiule. Chì, puru s’ellu ghjunghje à a fine u prucessu per un statutu di autunumia ùn ci serà micca, cum’elli a ponu teme unepochi, un ipercentralisimu… » Xavier Czerwinski, u sicretariu generale di a prefettura di u Pumonte, incalca dinù ellu nant’à l’ambizione spartuta : « Sò propiu felice di vede una cuesione tale per dà l’esempiu di ciò ch’ellu deve esse un prugettu di territoriu chì privileghja a mubilità cullettiva inde a pianificazione eculogica. Ci vole à sapè pensà luntanu è agisce in prussimità. Pudete cuntà nant’à a sulidarità naziunale à un livellu altu. » Si pensa, di sicuru, à u PTIC… In fine, incù a voce di u so direttore generale, hà incalcatu u presidente di a CCI di Corsica, Jean Dominici, nant’à u fattu ch’ellu sprime stu protocollu di accunsentu una forma di maturità chì ùn pò benefizià chè à a Corsica è à a so pupulazione. Si ralegra dinù di custattà ch’elli s’acconcianu i prugetti logistichi è l’azzione di fondu elaburati da a camera è chì cercanu à rende di più sobriu, di più funziunale è di più sicuru, u portu di cummerciu di Aiacciu, in a cuncipitura d’inseme di u schema di accunciamentu di l’intrata di a cità : « L’integrazione di l’imbusche ecunomiche è cummerciale inde un ambiu chì megliureghja a qualità di vita dà un sensu è un bon’ sensu à a cuncipitura di un mudellu novu di sviluppu. Di fatti, vi assicura a CCI di Corsica una participazione sana è attiva. »

ARTICLE PARU DANS L’ÉDITION N°40 (février  2024) DE LA LETTRE – CCI DE CORSE