A lettera | Ecchippamenti portuarii : U portu di Bastia face a scumessa di a securità

A lettera | Ecchippamenti portuarii : U portu di Bastia face a scumessa di a securità

Sò venute unepoche di boe-rampali contru à i fondi alti è una reta d’anemometri per parà u ventu, à alzà di parechji piani u livellu di securisazione per e manovre di i battelli è u pilutaghju fin’à i moli.

Era una priurità a securisazione di u pianu d’acqua di u portu di cummerciu di Bastia per a Cullettività di Corsica, per u cuncessiunariu è per u Statu. Eppuru, prisenta l’avanti portu di Bastia un caratteru periculosu chì nimu puderà nigà. In i tempi passati, anu avutu à scumbatte i battelli cù parechje avarie chì ne facenu a testimunianza, senza cunsiquenza dramatica, è ancu di grazia. Ma, inde u duminiu di a navigazione marittima, ùn hè mai incertu u peghju, hè per quessa ch’ella hè stata stallata una balisera nant’à i fondi alti i più maiò, longu à a Caletta, per a quale avia sullicitatu Jean Dominici a spertizia di a Direzzione interregiunale di u Mare Mediterraniu è di modu più particulare i servizii di i Fanali è di e Stantelle.

Hè statu ricevutu di manera perfetta u messaghju è avia seguitatu un ciculu di reunione per urganizà a messa in ballu di una balisera efficiente à u quale anu participatu in particulare u capu di pilutaghju di a stazione di Bastia è u Cummandante di i Porti. Hè stata l’uccasione per i piloti di spiecà cù precisione i sfarenti tippi di manovre fatte è di cundizione d’accustera, di ghjornu quant’è di notte tempu, non solu cù u gattivu tempu è u ventu viulente, ma dinù pigliendu in cunsiderazione ancu puru a pulluzione luminosa di a cità, chì ùn hè micca senza effettu, puru limitatu, nant’à u livellu di visibilità.

Dopu à un avisu favurevule di u spertu nauticu di i Fanali è di e Stantelle, a CCI di Corsica hà fattu l’acquistu di cinque boe di signalisazione incù un focu rossu cù un ritimu scintillante cuntinuu. Ci serà vulsutu à aspettà u mumentu predilettu à u livellu climaticu, dopu à parechji ghjorni di ventu, da pudè fà un’istallazione sempre spettacularia. Ste boe, inghenate nant’à i corpi morti, sò state cuncipite per resiste à e cundizione meteurologiche e più dure è à l’elementi marini. Fatte cù materiali chì resistenu à a currusione, formanu oramai una linea chjara di dimarcazione sempre di più utule chì, in a perspettiva di a crescita di a maiurezza di i battelli, sò fatte sempre di più manovre, è in particulare in marchja in daretu, inde un cuntestu custrettu.

A forza è a direzzione di u ventu in tempu reale

Passa dinù u rinfurzamentu di a securità nautica di u portu di Bastia per una reta nova anemometrica chì, quì dinù, hà fattu l’ogettu di una cuncertazione larga cù a stazione di pilutaghju, a Capitaneria, u serviziu di i Fanali è di e Stantelle di u Cismonte è a Direzzione di u Mare è di u Liturale di Corsica. Cum’è per e boe, sò cinque anemometri chì sò stati pusiziunati nant’à tanti punti di misure è in l’occurrenza i maghji stallati da a nostra camera : u molu di u Tragone, per racoglie l’infurmazione capunanzu, u postu nant’à u molu numeru 8, a Capitaneria, u molu meridianu è u molu à levante. 

Hè capitale a messa in ballu di sta reta, chì ghjè uperaziunale oramai, per a sicurezza portuaria postu ch’ella permette di visualizà in tempu reale a direzzione è l’intensità di u ventu, ma dinù a vitezza instantanea di e raffiche, a so frequenza è a so durata. Per via di una appiecazione nant’à estranet, hè tutta a cumunità portuaria chì hà accessu in diretta à tutte st’infurmazione precise quant’è utule, in particulare quand’ellu s’avvicina à u portu u battellu. Ùn diceremu mai abbastanza ch’ella hè essenziale à a securità in mare a signalisazione marittima. Si cunnosce troppu bè, inde u Capi corsu è in Bastia, a so porta d’entrata, a forza inaudita è scatarza di u Libecciu per ùn piglià micca e dispusizione e più bone pussibule. Per a putenza publica, per l’armatori quant’è per l’avventori, eranu indispensevule a balisera di e nostre acque interne è a lettura anemometrica.

Da pudè mette in ballu fin’à l’ultimu a seria di e misure pigliate à favore di a securisazione di u portu di Bastia, ci vole à precisà chì sò state rinnuvellate e difese d’approdu di u postu à molu numeru 8 è chì u postu à molu numeru 4, nant’à a riva nordu, hà vistu u so dispusitivu d’accolta megliuratu per permette a ricezzione di l’ultimu natu di a Moby Lines (2500 passageri è 580 veiculi) à bordu di u quale hà celebratu a cumpagnia u so mezu seculu di prisenza in Corsica…

U sciffru

355 000 € : Hè u costu glubale di l’investimentu realizatu da a CCI di Corsica per st’accunciamenti novi : 230 000 € per a balisera è 125 000 € per a reta anemometrica. 

Lire l’article en version française

ARTICLE PARU DANS L’ÉDITION N°43 (avril  2024) DE LA LETTRE – CCI DE CORSE